وصلتني هذه الدعوة الظريفه من منظمي مؤتمر قادة المستقبل

لازم تركبها علشان تعرف موعد وتفاصيل الحفل الاعلاني عن المؤتمر..وركبتها بعد جهد !

وموعدنا معاهم اليوم

واهاهاها

!السمايل فيس اذا استخدمته البنت له وايد معاني..بس ولا معنى يعبر عن السعادة او الرضى

هذي الجمل اللي تقولها البنت بقلبها لمه تحطلك سمايل فيس:

-  ادري انك متحسف انك هديتني فلا تحاول

- انا استانس عليك كصديق فلا تتمادى معاي

- مليق  !

- انا بسوي نفسي تكانه جدامك

- اللي سويته ماراح يعدي على خير..لا تحاول ترقع

لول نفسهم ما تغيروا !

أهدت اليوم النائبة صفاء الهاشم مطرقة مرصعة بالالماس لرئيس المجلس علي الراشد..

فناتق الحريم..حتى بالمجلس !

مصدر الصورة: حساب صفاء الهاشم الرسمي في الانستغرام

•  نوع القافه: هذا النوع اللي ما تبي يطوفها شي..كل ما تحطين صورة  بالانستغرام لازم تسأل: من وين ؟ بجم ؟ توصلون بيوت ؟ في مقاسات ؟ شنو المقادير ؟ .. حتى لو حاطه صورة اخوج الصغير عادي تسألج: في منه الوان ؟

• نوع الأمهات: هالنوع المسكين كل بروفايلهم صور طبيعه مكتوب عليها صباح الخير او تصبحون على خير..واكثر صوره فيهم عليها اربع لايكات

• نوع الفايز: هالنوع اللي يصدمك يدش بروفايلك ويحطك انت وربعك اللي ما يعرفهم منشن ويقول “صوتولي على صوره 24 دشوا الحين على الاكاونت وصوتوا” , يعني مو مكفيه ان متليقف عليك وعلى ربعك, يبيك تروح تدور صورته بالاكاونت وتسويلها لايك..المميز بهالنوع ان دايما يحب يكون فايز..حتى لو ماكو مسابقات تلقاه ينطر اي واحد يجط صورة عشان يسوي لايك بسرعه ويكتب: أول لايك ! #انزين شتبي يعني

• - نوع اللي ودها وما يخلونها: هالنوع من البنات اللي ودها تحط صورها بس اهلها من مخلينها..فتلقى اكاونتها كله اظافرها بكل الالوان..واذا باعتها شوي تحط صورة عينها وتظل خشمها ! #انزين خشمج شبسوي فيه يعني !

• - نوع الصيدة: هذا اللي يحط صورته مفصخ من فوق علشان يبين الجسم (المشعر) ..ويصير مينون اذا شاف صورة وحدة حلوه ..تلقاه بسرعه يكتب: ماشالله, او شيلي صورتج لا يحسدونج, او انتي كويتية؟..يعني يكون مضبط بالاسلوب مع الويه!

• - نوع ملكه الستايل: هالنوع اللي شرت توربان وعرفت شلون تلفه على راسها فقررت تتقمص شخصيه خبيرة موضه..تلقاها تصور روحها وتكتب كل شي من وين شاريته وتحط بالانستغرام..المشكله لا الجسم جسم موديل ولا اللبس عدل وتصورلك على جنب ماسكه تنورتها ورافعه ريل وحده وتغمز ! #لا يدري عنج ابوج!

- عشان تقط دم قلبك عالعرس..وبعد جم شهر تتطلقون عشان امك ما ابتسمت بويه مرتك بالزوارة..مو حسافه ؟

- عشان توقف على حيلك بالساعات بالعرس وربعك مأذينك..ومرتك من الصبح بالصالون وثمانتالاف ماشه بشعرها..وحر الاضاءات عليكم والزحمه والتعب..مادري شلون لكم خلق تتجابلون بعد العرس !

- عشان تستقبلون بالعرس الحريم اللي يايين يشوفون العذاريب فيكم وبالعرس وتصير عندهم سالفه يحشون فيها لي اخر الاسبوع

- عشان امها تعاند امك بتصميم الكوشه واغاني الدي جي ونوع الكاكاو ومنو المصورة وجم بطاقه يبون..وانت تاكلها

- عشان اذا ربعك زفوك بالعرس ودخلوا رقصوا..يقولون عن ربعك هيلق..واذا كانوا ذربين يقولون عن عرسكم ملل ودمه ثقيل

- عشان كل شوي يموت احد عمرهم ما شافوه بس لازم يأجلون العرس عشانه..عاد انت حاول ان تداري الكل عشان لحد يموت ويوهقك كل شوي

واخر شي..

- عشان تقط عالاقل ١٥ الف دينار..عشان الناس يستانسون وانتوا واهلكم تتأذون وتتعبون..مع ان هالمبلغ تقدر تسافر فيه ثلاث سفرات مع مرتك وتشتريلها اللي تبيه وترد تأثث شقتكم بالباجي !